މަދީނާ ޔުނިވަރސިޓީ އިން ގްރެޖުއޭޓްވުމަށްފަހު ވެސް ޝައިޚް ދަޢުވަތުގެ މަސައްކަތުގައި ޙަރަކާތްތެރިވުމުގައި ދެމިހުންނަވާ، އަދި ޝައިޚްގެ އުސްތާޛުންނާ ގުޅުން ބަހައްޓަވައެވެ. އެތައް އަހަރުތަކެއް ވަންދެން، ޝައިޚް އަޙްމަދު އިންޓަރނެޓުގައި އެންމެ ގިނައިން ޒިޔާރަތްކުރެވޭ އަދި އެންމެ މަޤްބޫލު އިސްލާމީ ވެބްސައިޓް ކަމުގައިވާ އައް-ސަލަފިއްޔޫން ހިންގަވާފައިވެއެވެ. މި ވެބްސައިޓުގައި ދުނިޔޭގެ އެންމެ މަޝްހޫރު، ޙައްޤު އަދި ސާބިތުވެ ހުންނެވި ޢިލްމުވެރިންގެ ފަރާތުން ޚާއްޞަ މަޢުލޫމާތުތައް ފޯރުކޮށްދެއްވިއެވެ. މީގެ ކުރިން ގިނަ ބަޔަކަށް (ޚާއްޞަކޮށް ހުޅަނގުގައި ތިބި މީހުންނަށް) ލިބެން ނެތް ޢިލްމުތަކެއް ފަސޭހައިން ލިބޭނެގޮތް ހައްދަވައި ދެއްވިއެވެ. 2002 ވަނަ އަހަރު ޝައިޚް އާއި ޝައިޚްގެ ބައްޕާފުޅު ހައްޔަރުކުރުމަށްފަހު، ސަރުކާރުން މި ވެބްސައިޓް ނައްތާލިއެވެ.
2012 ވަނަ އަހަރު ޖަލުން ދޫކޮށްލުމަށްފަހު، ޝައިޚް އަޙްމަދު ދަޢުވަތުގެ މައިދާނަށް އެނބުރި ވަޑައިގަތީ ދުނިޔޭގައި މަޝްހޫރުވެފައިވާ ތަޥްޙީދުގެ ދަރުސްތައް ފައްޓަވަމުންނެވެ. ޝައިޚުލް އިސްލާމް މުޙައްމަދު އިބްނު ޢަބްދުލް ވައްހާބުގެ އަލް-އުޞޫލު އައް-ޘަލާޘާ އިނގިރޭސި ބަހުން މީގެ ކުރިން ދުވަހަކު ވެސް ނުދެއްވާ ގޮތަކަށް ކިޔަވައި ދެއްވަވަމުންނެވެ. މި ސިލްސިލާ ހަލުވިކަމާއެކު މަޝްހޫރުވެގެން ދިޔައީ މި ފޮތުގެ މައްޗަށް މިއަދާހަމައަށް ރެކޯޑުކުރެވިފައިވާ އެންމެ ނުފޫޒު ގަދަ ސިލްސިލާގެ ގޮތުގައެވެ. އަދި ﷲގެ ވާގިފުޅާއެކު، ދުނިޔޭގެ އެކި ކަންކޮޅުތަކުގައި މި ދަރުސްތަކާ އެކުގައި ތިބި އެތައް ހާސް މީހުންގެ މެދުގައި ތަޥްޙީދުގެ ޙަޤީޤަތް އާރޯވެގެން ދިޔައެވެ. ޝައިޚް ފަހުން ހިޖުރައިން 1434 ވަނަ އަހަރުގައި "ދަ ޖެމްސް އޮފް ރަމަޟާން" މި ސިލްސިލާ ފެއްޓެވިއެވެ. މި ސިލްސިލާއިން ހިތްވަރު ދެރަވެފައިވާ ނަފްސުތަކަށް ހިތްވަރު ލިބި، އެމީހުންގެ އަޅުކަންތައްތައް އިތުރަށް ރަނގަޅުކޮށް، ޖައްނަތުލް ފިރްދައުސް ހޯދުމަށް މަސައްކަތްކުރުމުގައި އާ ޖޯޝެއް ލިބިގެންދިޔައެވެ. އެއީ ސަލަފުންގެ ދިރިއުޅުމުގެ ކުރު ޚުލާޞާތަކަކާއި، އެއިން ނަގައިގަނެވޭ އަޅުކަމާއި ގުޅޭ އަގުހުރި ނަސޭޙަތްތަކަކުންނެވެ. އެންމެ ފަހުން ނެރުއްވި ސިލްސިލާގައި، ހިޖުރައިން 1443 ވަނަ އަހަރުގެ ރަމަޟާން މަހުގައި، ޞުލްޙު އަލް-ޙުދައިބިއްޔާގެ ތާރީޚީ ހާދިސާތަކަށް އަލުން ބަލައިލެވުނެވެ. އޭގެތެރެއިން މި ވާހަކައިގެ ތަފްޞީލުތަކަށް ފީނައި، މި މުޢާހަދާގެ ޢިއްޒަތްތެރިކަން އަލުން ސާބިތުކޮށްދެއެވެ. އަދި މޮޑަނިސްޓުން ފަތުރާ މި މުޢާހަދާއާ މެދު ބަލިކަށި ނަޒަރަށް ރައްދުދެއްވެވިއެވެ. އަދި ހަމަ 1443 ވަނަ އަހަރު ނެރުއްވި އަނެއް ސިލްސިލާއަކީ "ފުރޫޢު އަލް-ފިޤްހު" އެވެ. މި ސިލްސިލާގައި ޝައިޚް ދަރުސްދެއްވަނީ ޙަންބަލީ ފިޤުހުގެ މަތުނެއް އިބްނު އަލް-މުބްރަދު ބަޔާންކޮށްދެއްވުމުގެ މައްޗަށެވެ. މިއީ ޝައިޚްގެ އާންމު އަދި ތަފްޞީލީ އުސްލޫބުގައި ދެއްވާ ދަރުސްތަކެކެވެ. މިއީ މީގެ ކުރިން އިނގިރޭސި ބަހުން ނެރެފައިވާ އެއްވެސް ފިޤުހު ދަރުސްތަކަކާ އަޅާ ނުކިޔޭ ފެންވަރެއްގެ ދަރުސްތަކެކެވެ.
ބަޔާންކުރެވުނު މަދު ކަންތައްތަކުގެ އިތުރުން، ޝައިޚް އަޙްމަދު ޖިބްރީލް ވަނީ އެތައް މައުޟޫއެއްގެ މައްޗަށް ދެއްވާފައިވާ އެތައް ދަރުސްތަކަކާއި ސިލްސިލާތަކެއް ނެރުއްވާފައެވެ. އެތައް އަހަރުތަކެއް ވަންދެން ސޯޝަލް މީޑިއާގައި ހަރަކާތްތެރިވެ ވަޑައިގެން، ފަހުގެ ހާދިސާތަކާއި ބެހޭގޮތުން ޚިޔާލު ފާޅުކުރައްވައި، މަޒުމޫނުތަކާއި ޕޯސްޓްތައް ނެރުއްވައި، އަޅުކަމާއި ބެހޭ ކަންކަން ބަޔާންކޮށްދެއްވައި، އޮޅުން އަރާފައިވާ ކަންކަން ސާފުކޮށްދެއްވައި، އަދި މަގުފުރެދިފައިވާ މީހުންނާއި މަގުފުރެދުންތަކަށް ރައްދު ދެއްވަމުން ގެންދެވިއެވެ. ޝައިޚްގެ ދަރުސްތަކާއި ސިލްސިލާތައް، އެކި މައުޟޫއުތަކާއި ފޮތްތަކުގެ މައްޗަށް، ނެރެމުން ގެންދެވެއެވެ. މީގެ ތެރޭގައި ފިޤުހުން ފެށިގެން، ހިތް މަޑުމޮޅިކުރުވަނިވި ވާހަކަތަކާއި، ތާރީޚާއި، ސުވާލާއި ޖަވާބުގެ ސެޝަންތައް ހިމެނެއެވެ. ﷲގެ އިރާދަފުޅާއެކު، ޝައިޚް އަޙްމަދުގެ ދަޢުވަތުގެ މަސައްކަތްތައް ވެފައިވަނީ އަދި ވެގެންދަނީ، ތަޥްޙީދުގެ އަލިކަމެއްގެ ގޮތުގައެވެ. އިނގިރޭސި ބަހުގެ "ދަޢުވާ" މައިދާނުގައި ފެތުރިފައިވާ މަގުފުރެދުމާއި މަކަރުވެރިކަމުގެ އަނދިރިކަމާ ދެކޮޅަށް މަސައްކަތްކުރަމުންނެވެ. ޝައިޚްގެ ދަޢުވަތުގެ މަސައްކަތުން އިރުމަށްޗާއި ހުޅަނގު ގުޅުވައިދެއެވެ. އެހެނީ ޝައިޚް ވަނީ އިހުޒަމާނުގެ ދުވަސްވަރުގެ ޢިލްމުވެރިންނާ ހަމައަށް ސަނަދު ގުޅިފައިވާ ޢިލްމުވެރިންގެ ކިބައިން ވާރުތަކުރައްވާފައިވާ އިސްލާމީ ޢިލްމު، މިފަދަ ފަހުމެއް ލިބުމުގެ ފުރުޞަތު ކުޑަވެފައިވާ އިނގިރޭސި ބަހުން ވާހަކަދައްކާ އަޑުއެހުންތެރިންނަށް ފޯރުކޮށްދެއްވާފައެވެ.
